1 500-მდე დაკარგული და ასეულობით დაღუპული ნეპალსა და ტიბეტში

ნეპალსა და ჩინეთის ტიბეტის ავტონომიურ რეგიონში მომხდარმა მასშტაბურმა წყალდიდობამ და მეწყერმა ჰიმალაის რეგიონი უმძიმესი ჰუმანიტარული კატასტროფის წინაშე დააყენა. ბოლო მონაცემებით, სტიქიის ზონაში თითქმის 1 500 ადამიანს ეძებენ, რომელთაგან დაახლოებით 800 უცხოელი ტურისტია.

სააგენტო Reuters-ის ინფორმაციით, დამანგრეველი პროცესები მას შემდეგ დაიწყო, რაც ჰიმალაის მთის მდინარეში მიწისა და ქვების უზარმაზარი მასა ჩამოიშალა. წარმოქმნილმა მძლავრმა ნაკადმა ქალაქები და ხეობები წამებში წალეკა.

სტიქიის შედეგები და მსხვერპლი – ნეპალი: პოლიციის მონაცემებით, დაღუპულთა რაოდენობა, სავარაუდოდ, 165-ს გადააჭარბებს. პოლიციის წარმომადგენლის აბი ნარაიან კაფლეს განცხადებით, სამაშველო ოპერაციის გაგრძელებასთან ერთად, მსხვერპლის ზრდას კიდევ ელიან. ქვეყანაში დაკარგულად ითვლება 500-მდე უცხოელი, მათ შორის: ინდოეთის (177), აშშ-ის (63), ავსტრალიის (34), ბრიტანეთისა (33) და კანადის (25) მოქალაქეები.

ტიბეტი (ჩინეთი): სახელმწიფო ტელეარხ CCTV-ის ცნობით, გირონგის ოლქში დაკარგულია 558 ადამიანი (მათ შორის 260 უცხოელი). ოფიციალური მონაცემებით, ჩინეთის ტერიტორიაზე ამ ეტაპზე 3 ადამიანის დაღუპვა დასტურდება.

ნეპალში სტიქიის ზონაში მობილიზებულია ავიაცია. მაშველები ვერტმფრენებით ცდილობენ გარე სამყაროს მოწყვეტილი ათასობით მოქალაქის ევაკუაციასა და მათთვის პირველადი დახმარების ნივთების მიწოდებას. სამაშველო ოპერაციები რთული რელიეფისა და უამინდობის ფონზე ინტენსიურად გრძელდება.