დენის სალუქვაძე ხელვაჩაურში ადგილობრივ მესათბურე ფერმერებს შეხვდა

ხელვაჩაურის მუნიციპალიტეტში სასოფლო-სამეურნეო საქმიანობა ახალ ეტაპზე გადადის. აჭარის ავტონომიური რესპუბლიკის სოფლის მეურნეობისა და გარემოს დაცვის მინისტრმა დენის სალუქვაძემ, სამინისტროს პროგრამის „სასოფლო-სამეურნეო გაერთიანებებისა და საოჯახო მეურნეობების განვითარების ხელშეწყობის“ ფარგლებში დაფინანსებული სასათბურე მეურნეობები მოინახულა. სამუშაო ვიზიტისას უწყების ხელმძღვანელი ბენეფიციართა საქმიანობას ადგილზე გაეცნო, პირადად მოისმინა ფერმერთა საჭიროებები და პროექტის მიმდინარე შედეგები შეაფასა.

რეგიონში აგრარული სექტორის გაძლიერება და თანამედროვე ტექნოლოგიების დანერგვა სამინისტროს ერთ-ერთ მთავარ პრიორიტეტად რჩება. როგორც დენის სალუქვაძემ აღნიშნა, მიმდინარე წელს მესათბურეობის განვითარების მხარდაჭერას განსაკუთრებული ყურადღება ეთმობა.

„2026 წელს მესათბურეობის განვითარების ხელშეწყობა ჩვენი ერთ-ერთი პრიორიტეტული მიმართულებაა. განსაკუთრებით მნიშვნელოვანია, რომ სახელმწიფო პროგრამების ფარგლებში მხარდაჭერილი საოჯახო მეურნეობები ეტაპობრივად ვითარდება, ზრდის წარმოებას და ადგილობრივ მოსახლეობას აძლევს შესაძლებლობას, საკუთარი შრომით შექმნას დამატებითი შემოსავალი და გააძლიეროს ეკონომიკური მდგომარეობა. ჩვენ მომავალშიც აქტიურად გავაგრძელებთ მსგავსი ინიციატივების მხარდაჭერას, რაც ხელს შეუწყობს ადგილობრივი წარმოების ზრდას, ახალი შესაძლებლობების შექმნას და სოფლის მეურნეობის განვითარებას აჭარის მუნიციპალიტეტებში“, – განაცხადა მინისტრმა.

აღნიშნული პროგრამის მთავარი მიზანი საოჯახო მეურნეობების განვითარება, ადგილობრივი წარმოების მასშტაბების გაზრდა, მოსახლეობის დასაქმებისა და შემოსავლების ზრდის უზრუნველყოფაა. ამასთანავე, პროექტი ორიენტირებულია ინოვაციური, თანამედროვე სასოფლო-სამეურნეო ტექნოლოგიების დანერგვაზე, რაც პროდუქტიულობის მნიშვნელოვან ზრდას განაპირობებს. 2026 წელს მესათბურეობის განვითარების ხელშეწყობის ფარგლებში, სახელმწიფო თანადაფინანსებით სულ 25-მდე ბენეფიციარი ისარგებლებს.

შეხვედრას მინისტრთან ერთად, აჭარის უმაღლესი საბჭოს წევრი მინდია დიასამიძე, ხელვაჩაურის მუნიციპალიტეტის მერი ზაზა დიასამიძე, საკრებულოს თავმჯდომარე არჩილ მხეიძე, მინისტრის მოადგილე ირმა აფხაზავა, პროგრამების განხორციელების დეპარტამენტის უფროსი ჯამბულ აბულაძე და სოფლის მეურნეობისა და გარემოსდაცვითი დეპარტამენტის უფროსი ლევან ბოლქვაძე ესწრებოდნენ. ადგილობრივი ხელისუფლების წარმომადგენლებმა ხაზი გაუსვეს მსგავსი პროექტების მნიშვნელობას მუნიციპალიტეტის სოციალურ-ეკონომიკური გაძლიერების პროცესში.