ახალი შესაძლებლობები ახალგაზრდებისთვის – სექტემბრიდან მასშტაბური სტაჟირების პროგრამა იწყება

ახალგაზრდების პროფესიული განვითარებისა და დასაქმების ხელშეწყობის მიზნით, სექტემბრიდან პრემიერ-მინისტრის მიერ ინიცირებული მასშტაბური სტაჟირების პროგრამა ამოქმედდება. პროგრამის ფარგლებში, სტუდენტებსა და კურსდამთავრებულებს 3 000-ზე მეტ ვაკანსიას შესთავაზებენ. საქართველოს მთავრობის ადმინისტრაციის უფროსი ლევან ჟორჟოლიანის განცხადებით, პროექტი მონაწილეებს საშუალებას მისცემს, თეორიულ ცოდნასთან ერთად, პრაქტიკული გამოცდილებაც შეიძინონ. განსაკუთრებით აღნიშნულია რეგიონული მუნიციპალიტეტების ჩართულობა, რათა ადგილობრივმა ახალგაზრდებმა საკუთარ კუთხეშივე შეძლონ პროფესიული უნარების დახვეწა.

პროგრამის მასშტაბი: 3 000-ზე მეტი ვაკანსია საჯარო სექტორში.

სამიზნე ჯგუფი: ბაკალავრიატისა და მაგისტრატურის სტუდენტები, ასევე, კურსდამთავრებულები.

„მნიშვნელოვანია, რომ ჩვენი თხოვნით, რეგიონებში მუნიციპალიტეტებმა დაამატეს ვაკანსიები, რათა ახალგაზრდებს ჰქონდეთ საშუალება, საკუთარ მუნიციპალიტეტში გაიარონ სტაჟირება. ეს ძალიან მნიშვნელოვანი პროგრამაა, ვინაიდან მონაწილეებს ექნებათ საშუალება, მიიღონ პრაქტიკული გამოცდილება, რაც მნიშვნელოვანია მათ შემდგომ პროფესიულ განვითარებაში“, – აღნიშნა ლევან ჟორჟოლიანმა.

სტაჟირების პროგრამის შესახებ დეტალური ინფორმაცია და განაცხადების მიღების წესი სექტემბერში გახდება ცნობილი.