საქართველოში სახელმწიფო დროშის დღე აღინიშნება

დღეს, 14 იანვარს, საქართველოში სახელმწიფო დროშის დღე აღინიშნება. თარიღი საქართველოს ერთ-ერთი უმთავრესი ეროვნული სიმბოლოს – სახელმწიფო დროშის პატივისცემასა და მნიშვნელობის ხაზგასმას ეძღვნება.
შინაგან საქმეთა სამინისტროს ინფორმაციით, სახელმწიფო დროშის დღესთან დაკავშირებით, ტრადიციულად, სამინისტროს სხვადასხვა დანაყოფში გაიმართა დროშის აღმართვის საზეიმო ცერემონიები. ღონისძიებები ქვეყნის მასშტაბით ერთდროულად ჩატარდა და მათში შსს-ის თანამშრომლები მონაწილეობდნენ.

ქვეყნის ეროვნული სიმბოლოს პატივისცემის ნიშნად, საქართველოს თავდაცვის ძალების სამხედრო მოსამსახურეებმა სახელმწიფო ჰიმნის ფონზე, საქართველოს დროშები საზეიმოდ აღმართეს. ცერემონიები განსაკუთრებული საზეიმო ატმოსფეროთი გამოირჩეოდა და ეროვნულ ღირებულებებზე, ერთიანობასა და სახელმწიფოებრიობის მნიშვნელობაზე ამახვილებდა ყურადღებას.

თავდაცვის სამინისტროს ცნობით, დროშის დღისადმი მიძღვნილი ღონისძიებები გაიმართა როგორც სამინისტროს ცენტრალურ ტერიტორიაზე, ისე თავდაცვის ძალების სხვადასხვა სამხედრო ბაზაზე. სამხედრო მოსამსახურეებმა კიდევ ერთხელ გამოხატეს ერთგულება ქვეყნისადმი და პატივი მიაგეს საქართველოს დამოუკიდებლობისა და თავისუფლების სიმბოლოს.

საქართველოს სახელმწიფო დროშის დღის აღნიშვნა საქართველოს ორგანული კანონით არის განსაზღვრული. სახელმწიფო დროშა, როგორც ქვეყნის სუვერენიტეტის, ისტორიისა და ეროვნული იდენტობის მთავარი სიმბოლო, განსაკუთრებულ მნიშვნელობას ატარებს.