ლიკა შაინიძე: ხელოვანი არ ვიქნებოდი, მეოცნებე რომ არ ვყოფილიყავი
ნათია იმნაიშვილი 27 48 93 –
ლიკა შაინიძე ბათუმელი მოყვარული მხატვარია, რომელიც თავის განცდებსა და სურვილებს ტილოზე აცოცხლებს. ხატვა არის ის, რაც მას უდიდეს სიამოვნებას ანიჭებს, გრძნობს, რომ ფუნჯი მის ხელში ჯადოსნური ხდება.
მაღიზიანებს – უყურადღებობა.
ვგრძნობ – რაღაც ახალი და კარგი მოხდება.
მეშინია – საყვარელი ადამიანების დაკარგვის და სიბნელეში მარტო ყოფნის.
შემიძლია – ერთგულება, პატიება, სიყვარული.
არ შემიძლია – საკუთარი სულიერი განცდების სხვებისთვის იოლად გაზიარება.
ვმეგობრობ – ცოტასთან, მათთან ვისაც ჩემი ესმის და ისეთს მიღებენ, როგორიც ვარ.
ვაპატიებ – თუ გულწრფელია სინანული.
ვტირი – როცა ვგრძნობ, რომ მივიწყებენ საყვარელი ადამიანები.
ვიცინი – როცა რაიმეს დამალვას ვცდილობ.
ვეძებ – სიმშვიდეს და სითბოს, ცხოვრებაში საკუთარ თავს ვეძებ.
ღირსი ვარ – პასუხი ვაგო შეცდომებზე.
ვკარგავ – ხშირად, ფანქრებს.
მაინტერესებს – ყველა სიახლე ხელოვნების შესახებ.
არ მაინტერესებს – სხვისი პირადი ცხოვრება.
მახსოვს – ის ადამიანები, ვინც კარგი გამიკეთა.
მრცხვენია – ჩემი საქციელების, უხეშად ნათქვამი სიტყვების, რომლებიც შეიძლება გაუაზრებლად მეთქვა.
ვმალავ – ჩემს სურვილებს.
ვინახავ – იმ ნივთებს, რომლებიც კარგ მოგონებებს მახსენებს.
მწამს – ღმერთის, სიყვარულის, ბედნიერი დასასრულის.
მიკვირს – ადამიანების, რომლებიც ბოღმას და შურს ატარებენ.
მიხარია – როცა სხვას ვახარებ რაიმეთი, როცა მათ ბედნიერ სახეებს ვხედავ.
ვამაყობ – იმ ადამიანებით, ვინც გვერდით მყავს.
ვაკეთებ – იმას, რაც ბედნიერებას მანიჭებს.
მესიზმრება – ხშირად, მონატრებული ადამიანები.
ვეხმარები – ყველას იმით, რისი საშუალებაც მაქვს.
მწყინს – როდესაც ადამიანების შრომა არ ფასდება.
ვუსმენ – ხშირად, ზღვის ხმას.
ვკითხულობ – წიგნს და სიახლეებს ხელოვნებაზე.
ვცხოვრობ – უკეთესობის იმედით.
ვმღერი – როცა მარტო ვარ.
ვასრულებ – დანაპირებს.
მიყვარს – თავგადასავლები, ხეტიალი.
ვოცნებობ – ძილის წინ, ოცნებებს კი ხშირად არ ვამხელ.
ვფიქრობ – დღის ბოლოს, რა გავაკეთე კარგი და ცუდი, რას გავაკეთებ ხვალ.
ვნანობ – უაზროდ დაკარგულ დროს, რომელიც წარსულში გავფლანგე.
მენატრება – ბავშვობის ის ყოველი წუთი, როცა ბედნიერი ვიყავი, თუნდაც მცირედით, როცა დამალულ შოკოლადს ვპოულობდი.
მსურს – ლამაზი მოგონებები შევაგროვო, რომლებსაც სიბერეში ლამაზად გავიხსენებ.
ვალამაზებ – ჩემს ნახატებს.
ვაფასებ – ერთგულ და ყურადღებიან ადამიანებს.
ვაღწევ – დასახულ მიზანს.
ხატვა – ყველა ადამიანს აქვს ისეთი საქმე, რომელიც მას ამშვიდებს, ავიწყებს ყოველდღიურ პრობლემებს. ზოგისთვის ეს მუსიკაა, ზოგისთვის – ცურვა, ქსოვა და ა.შ მე კი ხატვა მანიჭებს უდიდეს სიამოვნებას.
ფუნჯი – ჩემს ხელში შეიძლება ჯადოსნური გახდეს.
შემოქმედება – ადამიანის ცხოვრება შემოქმედების გარეშე სიცარიელის შეგრძნებითაა სავსე. შემოქმედი ადამიანი ყოველითვის ქმნის რაღაც ახალს და საინტერესოს, ამით ივსებს სიცარიელეს.
ხელოვნება – ჩემთვის ყოველდღიურობის ნაწილია. ხელოვანი არ ვიქნებოდი, მეოცნებე რომ არ ვყოფილიყავი. მე არ მხიბლავს მხოლოდ მატერიალური, ვცდილობ დავინახო და გამოვცადო უფრო და უფრო მეტი. მიზიდავს ხელოვნების მრავალფეროვნება და ყველგან ვხედავ მას.